BSU-da Rusiya universitetləri ilə əməkdaşlıq məsələləri müzakirə olunub

Oktyabrın 11-də Bakı Slavyan Universitetinin (BSU) rektoru, professor Nurlana Əliyeva 13-cü Azərbaycan Beynəlxalq Təhsil Sərgisində iştirak edən Moskva Politexnik Universitetinin Beynəlxalq inteqrasiya və xarici tələbələrlə iş üzrə idarəsinin rəisi İrina İvanova, A.N.Kosıqin adına Rusiya Dövlət Universitetinin Dizayn İnstitutunun direktoru Yekatirina Qurova, Kazan Federal Universitetinin Beynəlxalq fəaliyyət üzrə dekan müavini Liliya Yafuzova, Cənub Federal Universitetinin İnformasiya texnologiyalarının təhlükəsizliyi kafedrasının müdiri Yevgeni Abramovla görüşüb. Görüşdə Tədris işləri üzrə prorektor, professor Telman Cəfərov, Elmi işlər üzrə prorektor, professor Rafiq Novruzov, Beynəlxalq əlaqələr şöbəsinin müdiri Nərmin Quliyeva iştirak ediblər.

BSU-nun rektoru, professor Nurlana Əliyeva  qonaqları salamlayıb və onları rəhbərlik etdiyi ali təhsil müəssisəsində görməkdən məmnunluq duyduğunu bildirib. Rektor BSU-nun yaranma tarixi, fakültələri, ixtisasları, tədris prosesi, professor-müəllim heyəti, iştirak etdiyi yerli və beynəlxalq layihələr, xarici əlaqələri, universitetdə fəaliyyət göstərən tədris-mədəniyyət mərkəzləri, BSU-nun xarici ölkələrdəki Azərbaycan dili və mədəniyyəti mərkəzləri barədə ətraflı məlumat verib. Rektor qeyd edib ki, BSU təhsil və mədəniyyət mərkəzi kimi slavyan xalqlarının, həmçinin Şərqi Avropa və Balkan yarımadası ölkələrinin elmi, mədəni, mənəvi nailiyyətlərini öyrənir və tədris edir. BSU yalnız Azərbaycanda deyil, Qafqazda ən böyük və nüfuzlu rusistika mərkəzi sayılır.Bu ali məktəbdə bütövlükdə region üçün nadir sayıla bilinəcək ixtisaslar üzrə mütəxəssislər hazırlanır. BSU çoxprofilli ali məktəbdir.

Moskva Politexnik Universitetinin Beynəlxalq inteqrasiya və xarici tələbələrlə iş üzrə idarəsinin rəisi İrina İvanova, A.N.Kosıqin adına Rusiya Dövlət Universitetinin Dizayn İnstitutunun direktoru Yekatirina Qurova, Kazan Federal Universitetinin Beynəlxalq fəaliyyət üzrə dekan müavini Liliya Yafuzova, Cənub Federal Universitetinin İnformasiya texnologiyalarının təhlükəsizliyi kafedrasının müdiri Yevgeni Abramov  təmsil etdikləri ali təhsil müəssisələrinin tədris prosesi və elmi-tədqiqat fəaliyyəti haqqında məlumat veriblər. Xüsusi vurğulanıb ki, BSU-nun 13-cü Azərbaycan Beynəlxalq Təhsil Sərgisində  təqdim etdiyi zəngin stend onlarda çox xoş təəssürat yaradıb. Görüşdə elm və təhsil sahəsində gələcək əməkdaşlıq məsələləri ətraflı müzakirə olunub və  müvafiq qərarlar qəbul edilib.

Sosial şəbəkədə paylaşın: